Segundo establece a normativa de aplicación, poderase acceder a calquera curso das ensinanzas profesionais diferente ao primeiro e sen ter cursado os anteriores sempre que, a través dunha proba, a persoa aspirante demostre posuír os coñecementos necesarios para cursar con aproveitamento as ensinanzas correspondentes.

Para todas as especialidades a predita proba constará de dúas partes: interpretación, no instrumento da especialidade a que opte, de tres obras pertencentes a distintos estilos, do nivel correspondente ao curso inmediatamente anterior ao que se opte e das cales, como mínimo, unha deberá interpretarse de memoria, e un exercicio teórico-práctico para valorar os coñecementos dos cursos anteriores

Cada unha das partes cualificarase de cero a dez puntos, sendo precisa unha cualificación mínima de cinco para superar cada un deles. Ambos os dous exercicios deben resultar superados.

A cualificación definitiva da proba será a media ponderada da cualificación obtida nas dúas partes ponderándose a primeira delas nun 70 por cento, e a segunda nun 30 por cento.

A inscrición formalízase en liña e o custo da taxa de inscrición, á marxe de exencións ou bonificacións e que poden consultarse na plataforma mesma de inscrición, é de 34 euros. O pago é posible formalizalo tamén en liña a través da Oficina Virtual da Axencia Tributaria ou nunha entidade bancaria.

As celebración das probas de acceso aos cursos 2º a 6º do grao profesional para o curso 2025-2026 está prevista a partir do 16 de xuño de 2025.

As seguintes son as datas do calendario específico da proba, inscrición, publicación da oferta de prazas, probas, etc.

• 10 ao 22 de abril, prazo de inscrición.
• 30 de abril, oferta mínima de prazas vacantes para o curso 2025-2026.
• 30 de abril, publicación da lista de aspirantes admitidos.
• 2 de xuño, publicación de tribunais, datas, horarios e aulas das probas de acceso.
• 16, 17 e 18 de xuño, probas de acceso a 2º, 3º, 4º, 5º e 6º cursos de grao profesional.
• 19 de xuño, publicación dos resultados.

Nos botóns de abaixo é posible consultar os contidos, desenvolvemento da proba e criterios de avaliación dos exercicios das diferentes especialidades e cursos, á plataforma de inscrición, á plataforma de pago da taxa de inscrición, á guía sobre o pago en liña da taxa, á información sobre o servizo de piano acompañante que achega o centro e a súa solicitude e, na data referida máis arriba, á oferta mínima de prazas vacantes.