Curso de Iniciación 2024-2025
O vindeiro luns 27 está prevista a apertura do prazo de inscrición para o Curso de Iniciación correspondente ao próximo ano académico 2024-2025.
Na seguinte edición o deseño do curso será, substancialmente, moi semellante: traballo colectivo de música e movemento e achegamento ás diferentes especialidades instrumentais que é posible cursar no conservatorio. Cómpre apuntar que o curso está destinado a nenas e nenos nados no ano 2017.
Desta maneira, o Curso de iniciación desenvolverase durante a meirande parte do tempo de actividade lectiva do curso escolar. O curso organizarase en dúas sesións semanais, unha os luns co referido traballo de música e movemento, e outra os martes dedicada a coñecer as diferentes especialidades instrumentais.
En canto ao número de grupos e horario, serán tres os grupos, formados cada un por quince nenas e nenos, que se situarán ás 16:00, 17:00 e 18:00 das tardes dos luns. A sesión dos martes desenvolverase ás 17:00.
O prazo de inscrición, que é de balde, estenderase do 27 de maio ao 9 de xuño, e as corenta e cinco persoas aspirantes serán admitidas por orde de inscrición. Con todo, prevese formar unha lista de agarda para as nenas e nenos que non obtiveran unha praza no curso.
A listaxe coas persoas admitidas no Curso de iniciación publicarase o venres 21 de xuño.
A través da ligazón de abaixo é posible acceder ao formulario de inscrición no curso. Este permanecerá activo dende as 08:00 do 27 de maio ata as 23:59 do 9 de xuño.
Para resolver calquera consulta, pódese empregar o seguinte enderezo electrónico: cursodeiniciacion@cmusxoanmonteslugo.edu.es
